adelina221.jpg

Një histori dashurie e mbushur me sakrifica, madje e kundërshtuar dhe nga familja e saj, u mbyll dhimshëm. Këngëtarja e njohur kosovare Adelina Ismaili është veshur me rrobat e zisë, pas vrasjes së të fejuarit të saj Triumf Rizës, ditën e djeshme në Prishtinë. Ka qenë dashuri e fortë, ashtu siç është shprehur dhe ajo vetë para disa kohësh në media, dashuri që e bëri vajzën kosovare të linte Prishtinën për të jetuar në Kaçanik, pranë të dashurit. Ashtu siç ndodhte çdo mëngjes, ato janë përqafuar me njëri-tjetrin pa e ditur se kjo do të ishte dita e fundit së bashku. Një paradite e mbushur me telefonata mes të dashuruarve dhe një mbasdite fataliste. Dhimbja nuk ka fjalë. Asnjëherë nuk e kishte menduar të tillë fund. As në ëndrrën më të keqe nuk do ta kishte parë të tillë ndodhi.


Ngjarja
Ngjarja ka tronditur të afërmit e tij, e më së shumti Adelinën vetë, e cila është parë e shokuar në spitalin ku çuan më pas trupin e pajetë të të dashurit të saj. Lajmi bëhet edhe më i prekshëm për faktin se Adelina ishte shtatzënë me Triumin, i cili nuk arriti ta shohë krijesën e vet. Triumfi u qëllua për vdekje dje pasdite. Ai ishte polic i Shërbimit Policor të Kosovës dhe pjesëtar i Njësisë për Mbrojtje të Afërt, ndërsa kishte shërbyer edhe si truprojë e presidentit Fatmir Sejdiu. Ai për një kohë të gjatë kishte në lidhje dashurie me këngëtaren e mirënjohur, Adelina Ismajli.
Adelina la karrierën për Triumfin
Vetëm pak javë më parë, Gazeta publikoi se Adelina ishte shtatzënë me Triumfin. Fillimisht u tha se Adelina është shkëputur për një kohë të pacaktuar nga të kënduarit pas problemeve serioze me fytin. Ndërkohë që arsyeja ishte tjetër gjë. Madje një motiv mjaft i fortë. U përfol se këngëtarja kishte shtuar kohët e fundit disa kilogramë në peshë dhe se ajo kishte vendosur të mos dilte më në skenë, duke shmangur kontaktet me publikun. Pas kësaj u përfol shtatzënia e saj. Adelina Ismajli u tërhoq nga Prishtina për të jetuar në një qytet të vogël, në Kaçanik. Arsyeja ishte se aty jetonte edhe i dashuri i saj, Triumfi. Vendim i Adelinës ky, që mërziti tej masë familjen e saj, të cilët edhe pse nuk ishin dakord, nuk mund ta ndalonin kokëfortësinë e saj për t’u larguar nga Prishtina dhe për të braktisur karrierën e saj, qoftë edhe përkohësisht. Ajo nuk pyeti askënd dhe vendosi të tërhiqej pranë të dashurit të saj. Ndërkohë që lajmi i shtatzënisë së saj u bë një fakt, të cilin Adelina ua kishte konfirmuar vetëm miqve të besuar të saj.
Historia e dashurisë
Historia e dashurisë së Adelinës me Triumfin do të publikohej vetëm në kohën që këngëtarja mbeti shtatzënë. Në fakt, ajo e kishte pohuar prej kohësh që kishte marrëdhënie me dikë, për të cilin ishte shprehur se ndihej mjaft krenare, por nuk kishte treguar asnjë gjë rreth tij. Edhe pse në Prishtinë e kishin parë shpesh me Triumfin, ajo nuk do të prononcohej për dashurinë e saj në asnjë media. Vetëm kur ajo mori vendimin për t’u larguar nga Prishtina dhe për të nisur bashkëjetësën me të dashurin e saj, gjë e kushtëzuar edhe nga shtatzënia e saj, lajmi do të merrte dhenë. Madje, kohët e fundit ajo ishte parë gjithmonë në shoqërinë e tij, në kafenetë dhe lokalet e qytetit, duke e publikuar më së fundi me fakte dhe jo me fjalë këtë lidhje. Vetëm një javë më parë ata janë parë në baret e Prishtinës, në shoqërinë e miqve të tyre kryeqytetas.

Nga Ilda Lumani G.Shqiptare

ADELINA NE VARRIMIN E TRIUMIFITADELINA NE VARRIMIN E TRIUMIFITAdelina vajton per dashurine e saj….