Intervistë me organizatoren e “Miss Kosova 2007”, aktiviteti mbahet më 9 dhjetor në “Sheshi 21”. “Miss Kosova 2007” pas një muaji shkon në Egjipt
 

agnesavuthaj.jpgSeleksionimi i vajzave do të bëhet me datën 26 nëntor, ndërsa
spektakli do të mbahet më 9 dhjetor. Kështu që mendoj se jemi vonuar paksa në aspektin e mbajtjes së spektaklit, mirëpo fituesja do të merr pjesë nëpër disa spektakle me përmasa ndërkombëtare gjatë vitit 2008. Mund të theksoj se në fund të
muajit janar fituesja, pra “Miss Kosova 2007” do të udhëtoj për Egjipt, ku do të mbahet konkursi “Top Models of the World”.

Agnesë Vuthaj është vajza që në vitin 2003 është zgjedhur “Miss Kosova”.Ajo më pas pati edhe shumë suksese duke u shpallur një vit më vonë “Miss Albania”. Ka pasur edhe shumë pjesëmarrje nëpër konkurse ndërkombëtare, ndërsa ajo për dy vite me radhë ka të drejtën të organizoj “Miss Kosovën”.

Kjo është hera e dytë që ju po merreni me organizimin e spektaklit të bukurisë “Miss Kosova”. Cili është ndryshimi që shihni si organizatore nga viti i kaluar?

Agnesa: Kemi premtuar vitin e kaluar se do ta bëjmë këtë si një traditë dhe kjo na ka shtyrë më shumë që të vazhdojmë prapë përkundër vështirësive që kemi hasur vitin e kaluar.Mendoj se një ndryshim nga viti i kaluar është se këtë vit do ta kemi më lehtë sepse kemi marr një përvojë më shumë. Vitin e kaluar kemi pasur disa vështirësi që këtë vit i kemi eliminuar.

Më konkretisht, cilat kanë qenë ato vështirësi që i keni eliminuar këtë vit?

Agnesa: Mund të them se vitin e kaluar e kemi pas pak si problem
vendin ku është mbajtur, pra salla “1 Tetori”, sepse ka qenë jo shumë e përshtatshme për punë duke pas parasysh edhe klimën e ftohtë. Kurse sivjet ngjarja do të zhvillohet në “Sheshi 21”, që do të thotë se ambienti është shumë më i përshtatshëm. Mendoj se ky vend është shumë mirë i ndërtuar sa i përket skenës, ndriçimit, klimës, etj. Pos këtyre edhe vendet ku do të përgatiten vajzat janë më të përshtatshme. Mirëpo dua të theksoj se në krahasim me vitin e kaluar, këtë vit po konkurrojnë më shumë vajza nga e mbarë Kosova e diaspora.

Konkursi qëndron i hapur deri më 25 nëntor, kur do të mbahet spektakli dhe a mendoni se jeni vonuar paksa?

Agnesa: Seleksionimi i vajzave do të bëhet me datën 26 nëntor, ndërsa spektakli do të mbahet më 9 dhjetor. Kështu që mendoj se jemi vonuar paksa në aspektin e mbajtjes së spektaklit, mirëpo fituesja do të merr pjesë nëpër disa spektakle me përmasa ndërkombëtare gjatë vitit 2008. Mund të theksoj se në fund të muajit janar fituesja, pra “Miss Kosova 2007” do të udhëtoj për Egjipt, ku do të mbahet konkursi “Top Models of the World”. Ndërkaq nëse e fitojmë pavarësinë, “Miss Kosova 2007” do të
ketë mundësinë të merr pjesë edhe në “Miss Bota dhe “Miss Universe”.

Këtë herë keni ndonjë përkrahe institucionale,apo …?

Agnesa: Nga ana financiare nuk kemi ndonjë përkrahe. Të them të
drejtën as që e kemi kërkuar një përkrahe të tillë sepse vitin e kaluar nuk është mbajtur premtimi. Këtë herë kemi vendosur të mos zhgënjehemi nga institucionet përkatëse dhe ta realizojmë konkursin me ndihmën e donatorëve. Një përkrahe e madhe
institucionale është ajo që na lejohet të punojmë si e vetmja kompani. Pra “Agnesa Vuthaj Association” ka të drejtën ekskluzive për organizimin e konkursit “Miss Kosova”. Pra një e drejtë e tillë është dhënë nga Ministria e Kulturës dhe Tregtisë ku jemi të
regjistruar për këtë lloj biznesi.

Angesa, po flitet se këtë vit, pra shumë shpejt do të organizohen edhe dy konkurse tjera që kanë për qëllim zgjedhjen e “Miss Kosova”, pra njëri në Prizren dhe tjetri në Pejë. Keni njohuri ju për këtë dhe sa do t’ju pengonin këto dy organizime?

Agnesa: Nuk do të thosha se më pengojnë për shkak sepse ky yni është një organizim zyrtarë. Ka tri-katër ditë që është hapur konkursi dhe kanë konkurruar mbi 100 vajza, kjo tregon se organizimi ynë është më i besueshëm edhe nga vajzat konkurrente.
Mendoj se një besim të mirë e kemi fituar që nga viti i kaluar, dhe konkurse të tilla private mund të organizohen çdo ditë, mua nuk më pengojnë, por a do të kenë mundësinë pastaj të paraqiten ndërkombtarisht në ndonjë vend të botës, kjo është punë e tyre.

Pritni që do ta dorëzoj kurorën vajza që ende vazhdon ta mbaj atë, pra Besa Gashi?

Agnesa: Natyrisht se ajo do e përcjellë kurorën tek pasuesja e saj. Besa, mos të harrojmë se është zgjedhur mis nën organizimin time. Pra, Besës i takon një gjë e tillë.

Keni premtuar që me hapjen e konkursit se fituesja e këtij viti do të ketë mundësinë të shfaq bukurinë e saj nëpër konkurse ndërkombëtare. Sa do të arrini ta realizoni këtë?

Agnesa: Siç thash edhe më lartë, menjëherë pas një muaji që do të
zgjidhet “Miss Kosova 2007, kjo vajzë do të prezantohet në “Top Models of the World”. Është ky një konkurs shumë i madh, për të cilin unë kam licencën që dy vite. Edhe vitin e kaluar fituesja ka pasur të drejtën të merr pjesë në këtë konkurs. Besa Gashi fatkeqësisht nuk ka mundur të shkoj për shkak të disa problemeve
me dokumentacionin e saj dhe në vend të saj ka shkuar një vajzë
tjetër si përfaqësuese e Kosovës, Fatmire Buzuku. Pra, Fatmirën e kemi dërguar në momentin e fundit më qëllim që të mos e lëmë Kosovën pa e përfaqësuar. Gjithashtu unë kam edhe një marrëveshje me një agjenci të modeleve në Dubai dhe udhëheqësit e kësaj agjencia do të jenë anëtarë të jurinë në “Miss Kosova 2007”. Pra
edhe me këta do të kemi një bashkëpunim shumë të mirë.

Pra, si e komentoni mos pjesëmarrjen e Besa Gashit në këto konkurset e bukurisë?

Agnesa: Besa ka pasur mundësi por nuk i ka shfrytëzuar për shkak
të dokumenteve të udhëtimit. Kështu që pasi nuk ka marr pjesë në “Top Models of the World”, i ka humbur e drejta të merr pjesë edhe në Dubai për shkak se ata i pranojnë vetëm vajzat që janë paraqitur në këtë konkurs ndërkombëtarë.

Sa vajza do të jenë të seleksionuara për “Miss Kosova 2007” dhe cilat janë çmimet që i keni paraparë të jepen më 2 nëntor?

Agnesa: Për të mos e zgjatur shumë, mund të them se do të seleksionohen 20-25 vajza. Ndërsa çmimet që do të jepen janë ato të “Top 5”, “Miss Fotozhenia” dhe “Miss Miqësia”.

Gjelbrim Berisha Gazeta Tema