Ka kohë që është lidhur me Romeon dhe ndoshta pritet diçka së shpejti…Mos filloni të supozoni! Nuk po flasim aspak këtu për historinë e Shekspirit, “Romeo & Zhuljeta”. Ky është emri i të dashurit të saj prej dy vitesh, ndërsa ajo ka një emër të përbërë nga dy bashkimet Çeli-Jeta, – pas një martese të vonshme të të atit të saj, Ferdinandit me Majlindën në vitin 1984. Numri i muajit Gusht sjell për ju, këngëtaren dhe fotomodelen, Çiljeta Xhilaga. Por një lidhje akoma edhe më e vjetër ekziston midis saj dhe futbollistit portugez Kristiano Ronaldo… Asaj i pëlqen shpejtësia dhe kuptohet makinat!… Është supersticioze dhe impulsive, ndërsa atij femrat dhe aventurat… Ku ndodhet pikëtakimi i tyre?

ciljetaxhilaga.jpg

normal_c_ronaldo.jpg

Çiljeta Xhilaga
Datëlindja: 05.02.1985
Vendlindja: Tiranë
Gjatësia: 1.72
Pesha: 55 kg
Studion: Shkenca Politike, Viti III
Profesioni: Fotomodele, këngëtare

Hesperus, ylli i mbrëmjes i “Miss Çiljetës” dhe portugezit Ronaldo

Midis futbollistit të ekipit kombëtar të Portugalisë Kristiano Ronaldo dhe Çiljetës shqiptare ekzistojnë disa të përbashkëta, por edhe të veçanta! Të dy kanë lindur ditën e martë, më 5 shkurt 1985… Të dy janë impulsivë dhe të çiltër me njerëzit, por janë pikërisht këta tipa, që vuajnë më shumë. Ronaldo ka shpenzuar kryesisht paret për femra; për hapjen e dyqanit të modës të quajtur “CR7” në vendlindjen e tij në Funkal në shkurt të 2006-ës, si dhe për rritjen e një jetimi indonezian 11-vjeçar. Ndërsa, Çiljeta harxhon paratë e saj kryesisht për blerjen e makinave më të fundit dhe rrobave më të shtrenjta. Fëmijërinë, Kristiano Ronaldo e ka kaluar në një makinë-shtëpi të ndryshkur dhe të vendosur mbi katër shtylla betoni të thyera. Babai i tij, Jose Diniz Aveiro, ishte një kopshtar që punonte në fermë ndërsa e ëma kryesisht e papunë. Ajo zgjodhi emrin Kristiano, ndërsa i ati Ronaldo, por prejardhja e emrit erdhi nga Ronald Regan. Ndërsa për emrin Çiljeta, ishte nusja e xhaxhait që mori shkas nga emri i së ëmës së Xhemi Shehut – për t’i propozuar më pas Ferdinandit, emrin e së bijës së tyre të vetme: Çiljeta. Ajo u rrit në rrugën Fortuzi, në kryeqytet, si vajza e vetme e Drejtorit të Peshkimit, Ferdinandit dhe normistes së dikurshme të fermës, Majlindës (më pas Parukiere) të martuar në vitin 1984. Një vit më pas do të “çelte jeta”. Që në moshën 14 vjeçare ajo mori pjesë në festivalin, “Kënga Magjike”, si dhe u shpall modelja më e mirë në “Rinfest 2000-2001”… Në Tiranë gati çdokush e di që emrin e saj e mban parukeria e së ëmës, Lindës, e quajtur ndryshe: “Miss Çiljeta”. Binjaku i saj portugez Kristiano Ronaldo, vetëm në dimrin e vitit 2003, një revistë e komunitetit seksual të Lisbonës e përcaktoi atë si “mashkullin më seksi në Portugali”, ndërsa dolën fjalë që lojtari më i fundit i ekipit të Mançesterit ishte Gay – ndoshta edhe për shkak të ndërprerjeve së shpejta të marrëdhënieve me femrat. Ndërsa Çiljeta jo vetëm që s’ka ndërmend të ndërrojë gjini, por po konsiderohet akoma edhe më shumë si, “femra më seksi” dhe ka mbetur ende “Miss Kinemaja” e vitit 2000!

“Velur”…44°C në hammamin e parë shqiptar

Vjen një ditë që Çiljeta pranon të pozojë për të parën revistë meshkujsh, në bashkëpunim me Qendrën S.P.A. Velur, e cila ndodhet përballë Drejtorisë së Policisë në Tiranë. Velur ka të parën banjë turke në Shqipëri – e njohur ndryshe si Hammam ose Banja me avuj – si dhe një qendër të specializuar për masazhe dhe relaks (…madje me muzikë klasike në sfond!). Uji i ftohtë hidhej në dyshemenë e mermertë përreth asaj që njihet ndryshe Camekan (një pjesë e ngritur në formën e shatërvanit) çka bënte që në pak çaste të mbushej me avuj të nxehtë. Përreth disa çezma me ujë të ftohtë që njihen ndryshe me emrin Sogukluk. Në fund një kovë me ujë të ftohtë nga Rashidi të sillte në vete – një gjysmë turko-bullgar me disa tatuazhe në trup…një prej të cilëve djalin e tij 9-muajsh nga ana e majtë e zemrës. Hammamet janë përdorur që nga kohërat e lashta. Për tu magjepsur, duhet të hedhim vështrimin tonë në Turqi. Dikur këta të fundit i sillnin Tellakët (punonjës të Hammamit) nga vendet me besim jo-mysliman të Perandorisë Turke si, Grekë, Shqiptarë, Armenë, Hebrenj, Bullgarë apo Libanezë. Tradita e tyre është tejet e vjetër! Kur arritën turqit në Anadoll, ata u përballën me variantet lokale: Banjat Romake dhe ato Bizantine. Tradita pati një përzierje dhe njëherësh lindi një koncept i ri: Hammami. Sot ai është vendi ku mund të lahet çdo kategori sociale: të rinj dhe të moshuar!

“Moi…Lolita”

Lolita nuk është e thënë të jetë ajo, por… Lolita mund të jetë novela e Vladimir Nobakovit, filmit të vitit 1962 i regjisorit Stanley Kubrik, apo filmi i vitit 1997 i Adrian Lyne; ndoshta një qytet në Teksas apo “Moi…Lolita”, kënga e këngëtares franceze, Alizée. Lolitë, mund të jetë një emër apo një zhargon i përdorur për femrat që janë tërheqëse seksualisht, por edhe si term i shkurtuar i “Lollipop”-it, – një lloj pornografie që implikon gratë e moshuara përtej moshës së pjekur seksuale, të cilat pretendojnë se nuk janë aspak të tilla…! Çiljeta mund të jetë çdo njëra prej të mësipërmeve, por ky mund të jetë vetëm emri i albumit të saj me dhjetë këngë, që do të nxjerrë në treg së shpejti. Ajo e përkufizon veten si vajzë impulsive, “ndoshta shpeshherë më e çiltër sa duhet me shoqërinë. Jam e përkushtuar, shumë këmbëngulëse, besnike, por edhe nevrike”, shprehet Çiljeta. Por çfarë beson Çili, se pëlqejnë meshkujt tek ajo? “…ata më pëlqejnë në tërësi dhe jo në detaje – nga paraqitja dhe karakteri im!”. Si reagon Çili ndaj njerëzve që bëjnë komente kur kalon në rrugë? “I shmangem atyre pasi po t’i dëgjoja të gjitha, Çili do të përfundonte në ndonjë rajon policie”. Por tashmë Çiljeta mendon vetëm për lidhjen e saj dhe është krejt e qetë. E njohur me studentin e Fakultetit të Juridikut të vitit të dytë, Romeon, – 2 vite më parë, – më 6 gusht ajo pret të rikthehet sërish në atë Buzuk të Sarandës ku edhe u njoh me të. Ndërsa emri i realizimit të set-it fotografik Velur, i përket toponimit të emrit të një cohe franceze që përngjet kadifes së pushëzuar… Tashmë fiket imazhi dhe s´të kujtohet më asgjë tjetër përveçse Lolitës, masazheve orientale, djersitjes nga sikleti apo vapa, si dhe Tantrës indiane…

Djersa dhe seksualiteti

Po mendoni ç’lidhje ka djersa dhe seksualiteti? Ai është procesi i parë që ndodh në një banjë turke. Trupi mbushet me bulëza ende pa veshur nallanet prej druri, që Çiljetës i dukeshin me shumë si një nga personazhet e “Sailor Moon”. Kur mendon për djersën, shumica e njerëzve shtrembërojnë hundët kur ndjejnë aromën e pakëndshme…E vërtetë! Por megjithatë seksualiteti, është lidhur ngushtë me aromën që nxjerr mashkulli, por edhe femra. Ato eksitohen së tepërmi nga aroma e djersës së fuqishme të një mashkulli, përgjatë periudhës së ciklit menstrual. Djersitja e tij konsiderohet si një gjë seksi, në funksion të karakterit të saj dominues. Njerëzit e shkencës kanë parë se feromonet janë të rëndësishme në marrëdhënien e një çifti. Kështu shpjegohet edhe ekzistenca e disa çifteve të bazuara mbi racione dhe të tjerët mbi interesa… Studimet e kryera kanë nxjerrë si konkluzion se, hormonet kanë luajtur një rol vital në evolucion, duke kontribuar në propagandën e species njerëzore. Meshkujt me këtë evolucion hormonal sillen si xhelozë; të tmerruar nga ideja se mund të tradhtohen nga partnerja e tyre. E vërtetë apo jo, femrat në periudhën e ovulacionit kanë tendencën të shkojnë pas meshkujve që tregojnë më mirë dhe kanë performancë seksuale të madhe. Pra, djersitje më shumë? Ajo është shenja e parë e verës së nxehtë, gjendjes hot, në ndërthurje me atë emocionale dhe madje edhe një fenomen i hammamit…

Siguri, supersticion dhe macja e zezë

Siç kanë thënë dikur Helen Keller, autori i librit “The open door”: “Siguria është diçka supersticioze. Nuk ekziston në natyrë…Jeta do të thotë ose aventurë e paparë ose asgjë”. Një mendim tjetër ka pasur Ciceroni, duke thënë se, “Nuk shkatërrojmë aspak besimin duke shkatërruar supersticionet”. Dhe kështu, Çiljeta është tepër supersticioze. Dominimi i frikës prezanton vetëm fillimin e zgjuarsisë, por edhe fati shpesh. Çiljeta për shembull mban një Kuran të vogël dhe një trekëndësh në kroskotin e makinës Audi 6, por edhe i druhet maces së zezë (shumë njerëz bëjnë 3 hapa mbrapa). Në shumë vende të botës, kafshëza, konsiderohet si një shenjë e mirë. Rrëfehet se, macja e zezë ka qenë e lidhur ngushtë me faktin se ajo ka qenë shoqëruese e magjisë së zezë. Gjithashtu, ngjyra e zezë është konsideruar si ngjyra e natës dhe e gjërave dashakeqe, ndërsa në traditën ortodokse, e zeza është ngjyra që mbahet në ceremonitë mortore. Çudi apo jo, Mbreti Charles I-rë, mbante një mace të zezë, duke besuar se ajo i sillte fat. Rastësisht, ditën e 2-të, macja ngordhi, ndërsa Mbreti u arrestua dhe u dënua me vdekje. Por legjenda e tyre është edhe më e hershme, që nga Mijëvjeçari i ri, kur gratë e peshkatarëve mbanin në shtëpi mace të zeza; kishin 9 jetë për shkak se kjo shifër është ajo që sjell fatin dhe begatinë. Gjithashtu, qimet e maces së zezë përdoreshin nga femrat për t´i kthyer përgjigje një propozimi për martesë nga ata “që i gjuanin”; tri qime të zeza të futura në një kuti dërrase, të cilat formonin shkronjën N – No (Jo) dhe Y – Yes (Po). Vallë a do t´i kthejë Çiljeta një përgjigje të ngjashme “materialiste”, Romeos së saj, këtë gusht?…
…edhe diçka tjetër
Çiljeta i ka harruar prej kohësh përrallat! Dhe duket krejt normale… Por kjo është edhe një nga këngët e saj e vitit 2006. Për këtë vit, pret të dalë me albumin e saj të dytë. Që në periudhë të mitur, ndërkohë që kishte dalë në skenë si këngëtare dhe fotomodele, Çiljeta mbaroi shkollën e mesme “Sami Frashëri” me një bagazh të gjerë skenik. Foto në celularë, foto si wallpaper apo në gjithë faqet e internetit… Ndër këngët që kanë pasur performancë të shkëlqyer …është edhe bashkëpunimi i saj me grupin muzikor “Tingulli 3” në këngën “Dridhe”. Kënga e saj më e fundit e vitit 2006, titullohej: “Falma ti, falma”. Ç´ishte ajo vallë? “Duhet të ketë bërë ndonjë gabim që kërkon falje?” – ka bërë të ditur një komentues në një faqe virtuale. Kjo ishte në fakt një ndër këngët e saj të fundit: Një cigane që kërkon ciganin e saj! Kënga i dedikohet dashurisë. Klipi tërësisht me stil cigan, (si është ky lloj?). Ajo ecën në rrugë me një makinë kabrio (si dikur, në Qafën e Muzinës në Gjirokastër, me 180 km/orë?). Humb rrugën dhe gjendet pranë një kasolleje, ku ndodhet një magjistare. Ajo rrotullon globin dhe me magji e çon tek cigani, që ajo dashuronte. Për momentin në tregun muzikor po qarkullon një këngë e titulluar: “Je i papam”, – një bashkëpunim me Ingrid Gjonin, por deri në daljen e albumit të saj të dytë do të ketë shumë ecejake koncertesh anembanë Shqipërisë. Ndoshta sërish pushimet do t’i bëjë në Sarandë, aty ku është edhe vendi i njohjes me Romeon e saj…

12 motive + për të qenë Ujor

Motivi i parë “është të bësh diçka që nuk e merr vesh”. E dyta është edhe motoja e tyre: Informacion do të thotë Fuqi, ndërsa e treta “Kaq shumë e pavarur”. Për të vazhduar më tej, motivi i katërt “Je komplet e paparashikueshme” dhe i pesti: “Magjepsëse në gjithçka që të rrethon”. Me radhë: 6) Dëshirë për të shpëtuar botën; 7) Nuk të intereson se çfarë mendojnë të tjerët; 8) I ke opsionet e hapura; 9) Një jokonformiste e thekur; 10) Individualiste në zgjedhjet që bën; 11) Të pëlqejnë delikatesat e pazakonshme; 12) Open Mind: Bota e panjohur duhet respektuar përherë…

Nga Edmond Prifti Marre nga Revistaone

  • Postoje tek LajmeWeb
  • Postoje tek Kapsit
  • Postoje tek Ngjarjet
  • Facebook
  • Technorati
  • MySpace

Random Posts