“Punët dhe angazhimet me koncertet e panumërta nuk më kanë lënë që të jem pjesë e festivaleve në Shqipëri. Por ju siguroj që këtë vit do ta rikuperoj mungesën time me shumë pjesëmarrje jo vetëm në festivale, por edhe në klubet e natës”, flet dhe per projektet e saj ne 2008.

noraistrefi1.jpg

Prej gati një muaji duket sikur këngëtarja e njohur kosovare, Nora Istrefi, ka marrë arratinë nëpër botë. Sa në Amerikë,
Suedi e së fundi në Austri, ajo ka vendosur që t’i dhurojë vetes disa ditë relaksi, që në të vërtetë po zgjasin pak më shumë seç duhet. “Është e vërtetë që kam shumë kohë që jam me udhëtime nëpër shtete të ndryshme të botës, por vetëm për arsye pune dhe asgjë më tepër. Nuk është e vërtetë që unë dua t’u shmangem thashethemeve që kanë përfolur emrin tim për një lidhje intime me zëvendësshefin e UNMIK-ut, Steven Schook. Unë as e njoh atë njeri, as e kam ditur ndonjëherë se kush e ka pasur atë post. Gjithçka është një farsë për të përlyer emrin tim, megjithatë unë do e gjej të vërtetën në rrugë ligjore, madje deri në Hagë”, thotë ajo e indinjuar.

Por në këtë situatë të vështirë ajo ka gjetur barometrin për të vënë gjërat në vijë, duke iu futur punës me kokë, sepse siç pohon edhe ajo vetë, muzika dhe koncertet janë një formë e mirë për të harruar çdo gjë të keqe. Kështu, pasi ka qenë e ftuar në emisionet televizive për festat e fundvitit në Kosovë, ajo ka fluturuar menjëherë drejt Kanadasë, ku ka qenë e ftuar nëpër koncerte mes shqiptarëve të Amerikës. E më pas ka preferuar të ndjekë një tur të tërë, ku njëkohësisht ka dhënë koncerte dhe është marrë me përgatitjet për albumin e tretë që do të dalë brenda qershorit në treg. “Albumi do të përmbajë larmi zhanresh muzikore dhe shpresoj se do të pëlqehet nga publiku. Ajo që e bën paksa më të veçantë këtë album, është edhe bashkëpunimi im me një këngëtar të huaj, por kjo le të mbetet surprizë, sepse ç’kuptim do të kishte më pas nëse tregoj emrin e tij”. Ndërsa deri tani bashkëpunimet muzikore i ka pasur të përqendruara më tepër brenda rrethit kosovar, si me “Tingullin 3nt”, ashtu dhe me grupin “Aurora”, ajo çfarë e bën më të veçantë karrierën artistike të Nora Istrefit, është edhe kënaqësia që ajo merr kur publiku pëlqen e duartroket muzikën e saj, dhe kur ajo thotë që realizon rreth 200 koncerte në vit, që nuk janë pak për një këngëtar, dhe kjo tregon hapur se Nora është një ndër këngëtaret më të dashura të Kosovës, por edhe këtu në Shqipëri. Megjithëse ajo e ndjen se pjesëmarrjet këtu në Tiranë i ka pasur shumë të pakta dhe për këtë ka vendosur që t’i vërë gishtin kokës. “Punët dhe angazhimet me koncertet e panumërta nuk më kanë lënë që të jem pjesë e festivaleve në Shqipëri. Por ju siguroj që këtë
vit do ta rikuperoj mungesën time me shumë pjesëmarrje jo vetëm në festivale, por edhe në klubet e natës”, vijon ajo. Një ndër koncertet që ajo nuk do e shqisë për një kohë të gjatë nga mendja, është pjesëmarrja në shoun e reperit amerikan “50 cent”, ku ftesa për të qenë pjesë e tij për Norën ishte një privilegj. “Pjesëmarrja ime si suport në këtë eveniment të rrallë për Kosovën dhe më gjerë, që mblodhi afër 25 mijë veta nën qiellin e hapur dhe në temperatura minus gradë, ishte një kënaqësi ndoshta e papërjetuar deri atëherë jo vetëm për mua. Edhe publiku atë natë në stadiumin e Prishtinës krijoi
një atmosferë të paparë. Thjesht të gjithë u ndjemë pjesë e botës së madhe të muzikës”. Ndonëse është gjithë kohën në lëvizje, Nora nuk harron kurrë që të merret me veten, duke pasur linja perfekte dhe një luk për t’u pasur zili. “Mbajtja e trupit në formë kërkon një energji dhe kujdes koherent. Por unë ndoshta kam pasur fatin që jam për nga natyra energjike dhe disponoj me një imazh natyral, i cili reflekton freski edhe në lukun tim”, thotë ajo. Gjithë këto gjëra nuk i lënë kohë të mendojë për të dashur, pasi ajo vetë pohon që nuk e ka një të tillë në jetën e saj, duke hedhur kështu poshtë edhe thashethemet që thonë për një lidhje të saj me këngëtarin Getoar. “Me të kam vetëm marrëdhënie pune dhe asgjë më shumë.Nuk është hera e parë që mediat abuzojnë me emrin tim, duke më vënë lloj-lloj të dashurish, më i fundit ai që ju thatë, zëvendësshefi i UNMIK-ut, por mua realisht nuk ma ndjen”, përfundon Nora Istrefi. Korrieri