Adelina e dinte mirë se ç‘valleje po i hyja kur nisa të këndoja, ndaj më këshillonte që të mendohesha më gjatë në lidhje me këtë, duke më thënë: “Kjo rrugë është e shtruar me gjëmba që do jetë e vështire t‘i përballosh”.

Zanfina rikthehet dhe nuk kishte si të ndodhte ndryshe pasi stina e verës nuk mund të kuptohet pa një këngë të re të këngëtares sensuale nga Kosova.Zanfina, këto muajt e fundit kanë qenë shumë prodhimtarë për ty sepse ke ardhur te publiku me disa klipe njëri pas tjetrit…

Pse gjithë kjo dëshirë për të realizuar klipe dhe këngë të reja vazhdimisht?

Sepse kjo pritet nga një artiste, të sjellë krijime të reja për publikun, të jetë vazhdimisht aktive dhe pranë publikut me projekte të reja. Kjo më bën mua aktuale dhe të pëlqyer gjatë gjithë kohës… Në të vërtetë do kisha dashur të isha edhe më aktive në këtë punë por ja që vështirësitë në këtë profesion s‘na lejojnë më shumë aktivitet.Kam dëshirë që gjithmonë adhuruesve t‘iu ofroj këngë e projekte të reja dhe çka është më e rëndësishmja, të jenë origjinale.

Ndërkohë, ke ndonjë projekt tjetër të afërt?

Kam në plan disa projekte por për këtë verë do arrij të realizoj vetëm një prej tyre.Shpresoj që kënga të jetë e pëlqyer dhe njerëzit të kënaqen duke e dëgjuar.

Përse munguat kësaj here në Top Fest?

Vitin e kaluar unë isha pjesëmarrëse sepse më ftuan, kurse këtë vit mendova se do të ishte e tepërt të isha sërish aty. Vjet ishte interesante pjesëmarrja sepse kisha disa vite që s‘kisha përjetuar emocionet e një gare dhe dëshirën që të paraqitem sa më mirë.Dhe kënga u dëgjua shumë dhe unë e arrita qëllimin dhe
pjesëmarrja në Top Fest ishte një kënaqësi.

“As i fundit, as i pari” është pëlqyer shumë në Shqipëri… E ke shijuar suksesin e kësaj kënge edhe në Kosovë?

Gjithmonë kam menduar se në Kosovë është pëlqyer më shumë se në Shqipëri, pasi atje s‘kam qenë shumë e pranishme me koncerte. Në Kosovë është pëlqyer shumë kënga, ajo është hiti im më i madh.

Kur mund të të shohim sërish në Shqipëri?

S‘e di me saktësi, por besoj se së shpejti do të jem në Tiranë, e ftuar në ndonjë emision.

Duke të uruar pavarësinë na thuaj si u ndjeve në 17 shkurt?

Të falënderoj së pari! Jam ndjerë më mirë se kurrë më parë në jetë dhe mendoj se kështu janë ndjerë të gjithë shqiptarët. S‘kam qenë në Kosovë duke festuar, isha në Stockholm të Suedisë duke kënduar dhe festuar me mërgimtarët tanë, të cilët ishin shumë të përmalluar. Jam mallëngjyer shumë kur një burrë nga publiku u afrua dhe më tha: ‘“Zanfina, të falenderojmë që je këtu sonte me ne, sepse na kanë harruar të gjithë”. Atëherë, jam ndjerë shumë mirë që kam shkuar atje dhe kam bërë festën me ta.

Mendon se gjërat do të ndryshojnë për mirë për artistët tani që Kosova fitoi pavarësinë?

Mendoj se po, por kjo kërkon kohë pasi nuk mund të bëhen të gjitha për një ditë. Ndoshta gjeneratës sime do t‘i shkojnë edhe disa vite kështu por unë jam optimiste dhe besoj se së shpejti do t‘i gëzojnë të drejtat që kanë këngëtarët anembanë botës.

Shpenzon shumë për lukun dhe cila është gjëja më e shtrenjtë që ke blerë kohët e fundit për veten?

Po, e vërtetë që shpenzoj, por pjesa më e madhe e parave më shkon për rroba.

Gjëja më e shtrejtë?

Makina personale, e markës “Mercedes benz”.

Është shumë e fryrë garderoba jote dhe çfarë gjen më së shumti aty?

Vitet e fundit kam filluar të shpenzoj shumë për veshje, sepse qëkurse kam filluar të mbath taka të larta, shumica e garderobës sime ka ndryshuar dhe është bërë më elegante dhe femërore. Dhe që atëherë, më janë trefishuar shpenzimet për rroba.

Cili është thashethemi më i fundit që ke dëgjuar për veten? U kushton rëndësi fjalëve?

Ka kohë që s‘kam dëgjuar thashetheme për veten. S‘i pëlqej thashethemet, nuk merrem me to dhe mundohem që kokën time mos ta ngarkoj me të tilla gjëra që më duken të kota.

Çfarë pëlqen më tepër te meshkujt?

Sinqeritetin dhe ndershmërinë, si dhe aftësinë që ata kanë për të dashuruar shumë.

Po ata, çfarë kanë pëlqyer zakonisht te ty?

Sinqertitetin gjithashtu dhe faktin që i them gjërat troç, pa u shtirur njeri tjetër.

Si e kalon kohën e lirë dhe a ke shumë miq?

S‘kam shumë miq dhe ata që janë, i kam qysh nga fëmijëria dhe jam e sigurt për ta. Ndërsa kohën e lirë e kaloj me familjen ose me miqtë.

Dimë se ke një qen të cilin e do fort… Është e thjeshtë të kujdesesh për të?

S‘është aspak e thjeshtë, sepse kur ai sëmuret mërzitem shumë dhe atëherë jam tërë kohën te veterineri i tij, duke u kujdesur për të. Pastaj vijnë shëtitjet e përditshme që ia bëj në lagjen ku jetoj, por të gjitha këto i bëj me kënaqësi.Është dashuria ime e momentit!

S‘je e dashuruar me ndonjë qënie njerëzore?

S‘më pëlqen të flas shumë për jetën private.

Çfarë do kishe ndryshuar te vetja, po të kishe mundur?

Disa vogëlsira në karakterin tim, ndërsa përsa i takon pamjes, s‘do ndryshoja asgjë se jam e kënaqur me veten.

Cila është këshilla më e shpeshtë që të jep motra jote, Adelina?

Ajo e dinte mirë se ç‘valleje po i hyja kur nisa të këndoja, ndaj më këshillonte që të mendohesha më gjatë në lidhje me këtë, duke më thënë: “Kjo rrugë është e shtruar me gjëmba që do jetë e vështire t‘i përballosh”.

Jeni më tepër motra apo shoqe ju të dyja?

Të dyja bashkë. Kemi marrëdhënie shumë të mirë.

Tani që dhe ti je bërë e famshme, ka ndryshuar ndonjë gjë në raportin mes jush?

Jo, kurrsesi dhe kurrë s‘ka për të ndryshuar! Do mbetem gjithmonë e njëjta!

Nga GJERGJI POGA PanoramaPlus

Fotografi nga Zanfina Ismaili  http://www.galeriashqiptare.net/thumbnails-71.html

Random Posts

• Thashetheme për Agonin
• Dashuria e Alban Skenderajt me Miriam Canin
• Akullthyesit e netëve të bardha
• “Miss Shqiperia 2008″, emrat e 30 vajzave finaliste
• Shtepia e Big Brother ndodhet ne kushte skandaloze
• Jeta e motrave Elsa & Eni Lila
• Ciljeta & Ingridi, Çfarë fshihet mbas miqësisë së tyre
• Najada i thote Olsit lidhja jone ka marre fund
• Bertina vs Olta vs Graciela vs Pamela vs Domenika
• I dashuri i Rovena Stefës ndodhet në burg